Ministry Press Release - Seafarers Issue

Ni kaineti ma taian rongorongo ma maningongo iaon taekan okiia ara Kaimoa aike a mena ngkai I Biiti ao e kakawaki bwa ena itiaki raoi te oota ma te matata iaon ana kakamwakuri te Tautaeka ni babairea aron kaokakiia ara Kaimoa mai Biiti ao n taabo aike a mena iai.

Inanon June ao iai ana maroro te Tautaeka ma te SPMS are e maroroakinaki iai kakawakin kaokaia ara kaimoa aike a tuai n reke okiran Tarawa irouia man kanganga n irekereke ma te aoraki are e butinako ngkai ae te Covid19.  Te SPMS e butia naba te Tautaeka bwa ena kakoroa nanon te boraraoi n aron:

1. Ana bane n itinaki ara kaimoa ni kabane ni ikotaki ma aike a tuai n okira Kiribati, ao
2. Kateimatoaan te kibakiba nako tinaniku ike ana kona n okirikaaki iai ara kaimoa ao n mwananga naba ni kakioi aia kaibuke n mwakuri.

Ngkana e reke aei ao te SPMS ena manga rinanoa aron kamwakuraia ara kaimoa ma ana kambana aike e reitaki ma ngaia ao ni kona ni manga kabooua ana boraraoi te SPMS ma te Tautaeka.

N aron ae ataaki ao n te tai aio ao aron kaokakiia ara aomata ni ikotaki ma Kaimoa ena riai n rinanon ana kainibaire te Bootaki ni Mwakuri ibukin te Mauri ao Katoki Aoraki (Ministry of Health and Medical Services)ao aio are e karauaki naba n taraaki bwa anaaki rootaki ara botanaomata ngkana arona bwa a kaokaki kaimoa ma ara aomata man aaba aike e buti iai te aoraki ae te Covid19.  

Ea bon nang ataaki bwa te aoraki ae te Covid19 ea bon buti rinanon taian communities (community transmission) iaon Biiti e ngae ngke e waakina ana lockdown te Tautaeka n Biiti.  Irarikin anne ao ara Tautaeka ea tia ni butia Biiti itinakiia ara kaimoa ma ara botan-aomata aike a maeka i Biiti n te iti ni kamanomano man te aoraki ae te Covid19 ao man kabooa miin ana mwaitin ana iti Biiti are e kabongana ibukia ara botanaomata ma ara Kaimoa.  

N tai aei ao ae bon waaki naba te Tautaeka n iangoa aron kaokakiia ara kaimoa ma ara aomata ao ti karabwarabwa n ana anganano SPMS are e tauraoi ni kabwakai kantokaia ara Kaimoa ni kaokiia mai Biiti ao n taabo nako aike a mena iai ma n te tai aei ao e kakaeaki te anga ae ana oki iai ara kaimoa ao anaaki naba rootaki kain abara man te aoraki aei.  Bon te aoraki ae korakora ao man nang kanganga katokana ngaia are te Tautaeka e aki rimoa n kaokiia ma e karaua n tarai itera nako aike ana angaraoi ibukin kaokakiia.  Iai te katautau bwa ngkana e waekoa n kerikaki butin te aoraki iaon Biiti ao a moantaai naba ni kaokaki ara kaimoa ma ara aomata aike ikekei.